Bilinguited
Dr. Riet het das tragliun vendiert ...
Do que auncha Rumauntschas e Rumauntschs, chi discuorran ed inclegian be rumauntsch? - Na, già dalönch innò pü. Nus creschins sü cun duos linguas; cun rumauntsch e tudas-ch.
Tenor il linguist cuntschaint Jim Cummins rinforza l'imprender d'üna seguonda lingua eir la prüma lingua. Que voul dir, cha iffaunts da lingua tudas-cha chi imprendan rumauntsch paun profiter eir per lur lingua materna. Listess vela eir per iffaunts da lingua rumauntscha chi imprendan tudas-ch. Cummins disch però eir: Ad es fich important, cha la lingua da famiglia vegna cultiveda e discurrida, per ch'ella dvainta ferma e richa.
"Rumauntsch, tudas-ch in üna
inclegiains in Engiadina."
In ganz Europa, auch in der Schweiz, existieren Schulprojekte, welche die Zweisprachigkeit fördern. Diese soll den Kindern Vorteile bringen. Weil dem so ist, setzen wir auch bei uns auf die Zweisprachigkeit.
Savair linguas es la clev pel muond
La clevina rumauntscha es il simbol da la Rumantschia, s-chaffida dal rest d'ün Samedrin. Il rumauntsch evra las portas vers las otras linguas dal muond. Vairamaing as stuvess cumpletter quista bella teoria: Ils Rumauntschs haun adüna stuvieu imprender dasper lur lingua materna eir aunch'ün'otra lingua. Que als ho do ün'abilted dad ir intuorn cun otras linguas in üna maniera natürela e spontana.
Il Rumauntsch es dimena üna clev pel muond be pervi dal fat, ch'el es accumpagno da bel e principi dad ün'otra lingua, tar nus es que pel solit il tudas-ch. Il proget da scoula da Samedan nun es ün proget revoluziunari, chi mettess suotsur las experienzas fattas in scoula düraunt decennis. El as basa però sün üna lavur seriusa ed ingascheda da la magistraglia, el refletta e mett'in pratcha resultats scientifics areguard l'instrucziun da linguas, el vain purto dad instituziuns politicas e scolasticas. Il böt: Ragiundscher üna bilinguited consciainta e natürela, servind uschè in prüma lingia a noss iffaunts, il chapitêl da l'avegnir.
