Scoula primara
In scoula primara vegnan ca. duos terzs da las lecziuns instruidas in rumauntsch, ün terz in tudas-ch. In prüma e seguonda classa vain mantgnieu il princip „üna persuna – üna lingua“, que chi voul dir, cha la magistra da classa instruescha ils rams in rumauntsch ed ün oter magister ils rams in tudas-ch. A partir da la terza classa instruescha la listessa persuna rams in rumauntsch ed in tudas-ch, la lingua nu müda però infra üna lecziun.
S-chelin ot
Il s-chelin ot consista da la scoula reela e secundara. Eir scolaras e scolars da Bever e da Schlarigna frequaintan nos s-chelin ot. L’intermediaziun da la materia d’imprender succeda in möd biling. Impè dal princip „üna lecziun – üna lingua“ vain applicho quel da „l’adöver da lingua integro“. Que voul dir, cha las lecziuns sun bilinguas. Il müdamaint da lingua vain decis dal magister/da la magistra, cò e lo eir dals scolars. Il böt da quist princip es da ragiundscher üna bilinguited equilibreda in tuot ils rams e temas.
L’an scolastic 2005/06 es gnieu introdüt il model C. Que es ün model cun trais nivos i’ls rams rumauntsch, tudas-ch, matematica/geometria ed inglais. Cun quist model es que pussibel a mincha scolar(a) – saja da la reela u da la secundara – da frequenter in quists rams quel nivo, chi correspuonda a sias capaciteds. Ün(a) scolar(a) vela scu scolar(a) da la secundara, sch’el/ella nun es i’l nivo il pü bass in almain duos rams e scha’l güdicat cumplessiv güstifichescha quetaunt.
Il sistem da nivos pussibiltescha üna permeabilted pü granda per scolaras e scolars e cotres la furmaziun da gruppas d’imprender pü omogenas. Il böt da la scoula es que da resguarder auncha meglder ils differents duns, interess e capaciteds da noss scolars e da garantir üna scoula cun uschè pochs surdumandos e suotdumandos scu pussibel.
Promoziun integreda
Scolaras e scolars cun difficulteds d’imprender sun integros in lur classas d’eted e vegnan specielmaing chüros e promovieus in classa tres pedagogas curativas. La promoziun succeda per regla illa staunza da classa.
Integraziun linguistica
Sch’ün iffaunt d’ün oter territori linguistic fo müdeda a Samedan e nu so üna u tuottas duos linguas d’instrucziun, schi al spordscha la scoula düraunt duos ans traunter 5 e 10 lecziuns da lingua per eivna (rumauntsch e/u tudas-ch). Quist agüd d’integraziun nu succeda per regla cun lecziuns supplementeras, dimpersè tenor cunvegna cul magister da classa düraunt l’urari reguler da l’iffaunt.
Cuors da lingua per genituors
Insembel cull’Uniun dals Grischs/Lia rumauntscha organisescha la scoula cuors da lingua per genituors, chi vulessan imprender rumauntsch per pudair accumpagner a lur iffaunts da scoulina e da prüma classa.
